عومار ولد بومهدي 1

عومار ولد بومهدي

في ليلة الاثنين غالبا ناس الدوار كيتعشاو غير بأتاي و الخبز و الزبدة البلدية و كاين لكيدير الدشيشة ولا لحسوة المهم كيديبانيو باش ما كان حينت لخر ديال السيمانا.. و السوق كيعمر حتى لغد ليه الثلاث

عومار ساكن من قديم في الدوار و ملي عقل على راسو لقا راسو في هاد لقبيلة..عايش عيشة بسيطة بحال اغلب الساكنة بالكسيبة و لفلاحة معندوش مخاصوش مراتو هي الباتول بنت حميدة والد معاها ربعة لبنات كلهم زوجهم والعربي هو الولد الوحيد عندو باقي بلا زواج هو لي معاونو ... في هاديك الليلة ليلة الإثنين كانت ليلة باردة لا كلاب تنابح لا وجوه تشابه..من بعد ما شرب عومار و مراتو اتاي خرج لبرا gدام العتبة ديال لبيت برك حط حداه الدكيكة و جبد السبسي عمر جوج شقوفة و عيط على الباتول مراتو و قال ليها :

 هانتي هاديك العجلة لحمرة بنت البggرة الدبسة رطبي ليها سطل ديال شمندر راني غادي بيها غدا للسوق.


لباتول: تا اش كاين تاني ا مكتوبي يلاه ديتي جوج خروفات بعتيهم غا ديك السيمانا.. تا ولا تابعك السحت هاناري..

عومار: تي فلوس لخرفان مجاش داهم لمجدرم ديال ولد خوك باش حرث لينا هادوك لبرتيلات....شاطت منهم ستلاف الفين جبتها نخالة و ثلثلاف صيرتها خضرة و لحم و الف لي بقات في جيبي هي باش دوزت السيمانا

لباتول: هاديك لعجيلة زعما كنت ناوية نخليها بgرة ساعة الله يلطف و تgول حاجا تزاد علينا لي بانت تطنgشها

عومار :الله يعطيك مايطنgشك ا راس لهامة معارفة زرعها فين يطيح... فكرتيني بعدا بنت طامو جابت لك فلوس لحليب؟

لباتول: جابتهم و ليني مغتدي منهم تا ريال باغا نكسي الدراري ولاد زهيرة بنتي لعواشر هادي

عومار: اري ليا الفين بعدا معديش باش نخلص الصنك غدا و شدي داكشي لي بقا

لباتول: حلت السرة من زيفها و عطاتو لفلوس كاملة و قالت ليه....حسبش هادي شحال راه كي مدتهم ليا سريتهم و الله محسبتهم..

عومار: ااااااا والله هاد بنت طامو الا دايراكم ضحكة... ملي متعرفوش تحسبو لاش كتدفعو ليها لحليب لاش؟ هادي خمسالاف و ربمعية و تمانين ريال...
خدا عومار الفين و رد ليها الباقي و قال ليها هاديك راها ثلثلاف و ربمعية و التمانين ها هي غناخد بيها الدخان....

لباتول: غادي للبراكة تاني للكارطة...اشحال تموتو على لخنز كون تشم ريحة حوايجك لي حطيتي لبارح بريحة الgارو تهرب... الله يعفو عليك و خلاص.

عومار :سيري رطبي شمندر و gولي لهداك لصكع تاع ولدك منين يجي.. يدوز يجيب لمشطة ديال لبهايم من عند عبسلام ولد دريس يمشط لهاديك العجلة و يحيد ليها لكعلال من مراودها..انا غندوز عند ولد لعربي مول لبيكوم باش يطرgنا الصباح و سيري بقاي حالة فمك في التلفازا.

لباتول: نرطب من شمندر ديال لوزين و لا لاخر

عومار: لا ديري غا ديال لخاريج و عطي معاك نخيخيلة للعودة الا تشم الريحة... هاني جاي 

عومار لبس جلابيتو و خرج و قال ليها هاني مشيت ديري الزكروم من لداخل و لggي لعمود لباب لكبير الا يدخلو باحاد لقوانع .... (يتبع)