اول مرة طلعت للجامعة.. ديت حوايجي في واحد الباليزة جابها عمي من الطاليان الله يرحمو كتسد بالكود....مشيت فصلت واحد السروال ديال لحرير لون ازرق البروموتيمول و جوج سراول ديال الدانgري قميجة مصورين فيها الفواكه ديال هواي و قوامج اخرين من الفا gلب و شي فيستات و مونطوهات ديال شارل لوكهلمز و واحد الفيستة لون بيسطاش و بيجاما ديال النعاس بحال هادوك لكيلبسوهم المصريين في الأفلام .
المهم راك فاهم الذوق دكالي و الالوان ديال طبيعة بولعوان.
مgانة مذهبة و من طبيعة الحال صبابط و واحد البلغة صاوبها ليا واحد الخراز صاحب الوالد الله يطول في عمرو..على كل حال شدينا الرحال في الكار ديال نحلة العونات لمدينة السطات وصلنا للمدينة مع الثلاثة و نص لكتبعد على الإقامة الجامعية ببضع كيلو ميترات و كنا حنا شي اربع اشخاص.
وجايبين معانا صناديق ديال الخضرة و النعناع و اللحم و البيض.. و السمن و الزبدة.. بحالا غاديين للموسم ولا شي ملجأ.. على كل حال ملي خرجنا من المحطة ولا كيبان لينا داكشي بزاف هوندا و متهزوش لينا .
الطاكسيات مبغاوش يديونا اقترحت عليهم كروسة...تفكير سوقي راك فاهم من طبيعة الحال حينت تاعروبيت كتهزها معاك فينما مشيتي المهم مع الحرارة ديال شهر تسعود الطلبة رفضوا في الأول و لكن ملي شافو راسهم مغادي يديهم حتى حد انصاعو للفكرة ديالي و كلفوني انا مشيت بالزربة ضبرت على واحد الشاريو كبير ديال طالب معاشو شارجينا الباgاج و طلعنا للإقامة الجامعية...
و كان هداك النهار الأحد.. غاديين طالعين و كنضحكو شوية وصلنا كيبانو لينا الطوموبيلات كيوقفو غا لحديد الواعر و ااااااا ميمتي اش هادشي..لكاين هو ان ولاد لوينسيجي المدرسة الوطنية للتجارة و التسيير حتى هوما غاديين يسكنو في الإقامة الجامعية وهما لدايرين هذاك الكرنفال اخترقنا الزحمة و خوك مgعمش فوق الشاريو ...الدراري كانو يضحكو تكمشو وقف طالب معاشو حدا الميرسيديسات و بديت كنحط انا في لحوايج و الصنادق ديال الخضرة.
خلصت السيد مشا دخلنا حوايجنا و المؤونة..المهم دوزنا هاديك لعشية عمرنا واحد البراد ضربنا لكرون و الزبدة.. خلينا الدراري لخرين يوجدو الgاميلة... خرجنا حنا لقينا طاح الظلام شوية ديال المغرب.. بانو لينا لبنات كيتساراو في وسط الحي الجامعي خارج انا لابس لبيجاما حمرة ديال النعاس هههههه و البلغة وخرجت انا و هداك صاحبي و تgول غا عادل امام صافي..بانو لينا جوج بنات كيتكيفو زعمنا و مشينا عندهم انا كنت كنفتاخر على هذاك صاحبي كنعرف لفغونسي زعما ساعة غتصدق غا فغونسي ديال الثلاث ...
زغبني الله و بديت ببونسواغ و هما يبداو يشلخو ليك في لفغونسي انا شدتني البولة، المهم عرgت جاب الله طلبتهم يهضرو معانا شوية بالعربية حتى شديت روحي و ملي كنgول شي كلمة بالفغونسي كيتكرشخو عليا بالضحك صاحبي ولا بحال ملاحظ اومبير .مهم جيناهم بحال شي اكسطرا طيغيستغ.. وحدة سميتها اقبال و لخرا سميتها نسمة... المهم قلبناها ضحك هما مشاو ناشطين و حنا مشينا نادميين علاش هضرنا معاهم اصلا.. الغد ليه جا لكونسييرج دق علينا قال لينا تكلموا....
ملي خرجنا لقيناهم هوما مبتاسمات و كيتسناو فينا و هازين بلاستيكة.... جابو لينا شكلاط لتنطلق اول مغامرة عروبية في الحي...
0 التعليقات:
إرسال تعليق