عومار ولد بومهدي حلقة 3
من بعد ما وجد عومار الجعبوق قاد الطبيلة فوق الصندوق ديال المونادا و راجع البراد.. و خلاه يطلق شوية و يتصنت لعظامو، واسترسل في الحديث مع جلول.. و الشقوفة و هضرو في شلا أمور منها ديال الدوار.. و تكلمو على صعوبة و مشاق الحياة.
جلول متكي على جنبو، و مفرش هيضورة و متكي على مخدة ديال الحلفة، و كيعمر الشقيفات مرة ليه و مرة لعومار، شوية جبد ضامة من تحت لحصيرة.
جلول: تماطا لهادوك لبيادق راهم فوق لمسطرة فوق لحجر ديال العود
عومار: فينا جيه؟
جلول: راهم فوق راسك غياكلوك
عومار: راني عيان ليوم غااااادي تغلبني
عمرو الديور ديال ضامة.. و في لحظة لاعبين سمعو الدقان في الحانوت...
دقدقدق
جلول: شكوووون؟ تسانا
خرطزرملط...اتا هذا ولد لعربي اش مخرجك في هاد الليل؟
ولد العربي: الدخان... ارا واحد خمسة ماركيز و قيدهم
جلول: راه باقة شي حسيبة
ولد لعربي: وايهاااايه غا قيد تلغدا و نطرgك منين نكون جاي من السوق..
عومار: جابك الله ا اولد لعربي يلاه كنت غندوز عندك للخيمة
ولد العربي: متgولش ليا باغي تدي شي بهيمة للسوق راني غادي بفحل غليييض ديال ولد موسى..منخطا الا بغيتي تنرجع ليك نتا و رقية بنت السي احمد عندها غا عجلة صغيرة..
اش عندك بعدا انت ا عومار؟
عومار: راه غا عجيلة رgيgة.. صافي تا هذا نظر خليني تنمشي انا و رقية بنت اسي احمد، غا متعطلش عليا و تخليني بلا سوق..
ولد لعربي شعل gارو.. و قال ليه لا كون هاني من ورا لفجر انا عندك ولد موسى غنديه بكري
جلول: عطا لولد العربي كاس ديال اتاي من السرجم.. و ggال ليه دك دك بعدا
ولد لعربي: تكيف شرب اتاي و فضا الشغل مع عومار
عومار كمل الطرح ديال ضامة.. و ودع جلول على أمل يتلاقاو غدا في نفس الموعد من ورا لعشا..نفض جلابتو و جمع الطبلة و خدا السبسي و لكموسة..
با جلول انا غنمشي نتكا شوية تابعني السوق غدا..
جلول الله يسخر سير عالله جر الباب مزيان انا تابعك نزكرم من لداخل..
خرج عومار و شور للخيمة.. وصل ggفض الجلابة و نقز الحيط لي من جيهة الكوشينة.. لي حيطها محدور شوية..ديما في الليل كينقز حينت الباب كيتزكرم من لداخل..
داز للكوري شعل لبيل طل على لبهايمات لقاهم ggالسين كيجرو .. و تفقد حتى العجلة واش مشط ليها ولدو العربي. لقا الأمور هي هاديك..
حل خنشة ديال التبن...لبهايم وقفو كاملين شمو ريحت التبن.. فرق عليهم كاملين.. و عطا للعودة لي على برا.
دار الخنشة الخاوية في السرجم ديال الكوري.. نفض جلابتو.. و ggلس قفازي قدام لكوري جبد السبسي عمر شقف و بدا كيراجع في الذكريات... يتبع
0 التعليقات:
إرسال تعليق